Davvisámegillii

Hei! Lean Koivu-Jusse Ánne dahje Ville Ristena Eila Ánne, Anni Koivisto, 30 jahkásaš servodatberošteaddji, Suoma Sámedikki várreságadoalli ja eadneolmmoš. Doaimman sosiálademokráhtaid bellodatstivrra lahttun ja Anára gielddapolitihkkárin. 

Riegádin Gápmasis, bajásšadden Ohcejogas, golgen máilmmis ja gávdnen ruovttu Čeavetjávrris. Lean vázzán logahaga Ohcejoga sámelogahagas ja dan maŋŋá gazzan oahpu ámmátallaskuvllas sosiálasuorggis. Dat oahput báhce gaskan go álgen studeantapolitihkkii ja bessen gitta riikkadási servviid njunušbáikkiide. Dál lean joatkimin oahpuiguin. Lean bargan árrabajásgeassimis, bálvalansuorggi ámmáhiin, festiválabargguin ja sosiálapolitihkálaš áššedovdin. Olmmožin lean váibmoláđis, vuoiggalaš ja mearrediđolaš.

Mu politihkálaš jurddašeami vuođđun leat sápmelaš árvvut: hálidan fuolahit min birrasis, kultuvrra seailumis ja das, ahte juohke okta birge eallimis. Dáid ja eará dehálaš áššiid lean beassan ovddidit jo máŋggalágain rollain. Lean leamašan áirrasin Ohcejoga gieldda váldostivrras ja ráđđehusas. Ledjen maid evttohassan riikkabeaiválggain 2019 ja ožžon 881 jiena. Lean maid ee. jođihan Suoma ámmátallaskuvlastudeanttaid riikkasearvvi ja bargan Suoma logahatoahppiid lihtus áššedovdin.

Munnje oažžu álo leat oktavuođas, guoskkai dál ášši Sámedikki doaimmaid, Anára gieldda dahje eará. Munnje lea dehálaš, ahte buohkain lean vejolašvuohta váikkuhit daid áššiide mat gusket sidjiide.