Gii lean?

Lean Koivu-Jusse Ánne dahje Ville Ristena Eila Ánne, 27-jahkásaš servodatberošteaddji ja gielddapolitihkkár. Lean riegádan Gápmasis ja bajásšaddan Ohcejogas. Ohcejogas lean vázzán skuvllaid gitta logahaga lohppii. Dan maŋŋá vulgen ámmátallaskuvlii lohkat sosiálasuorggi ja vuodjut bargat mánáiguin, nuoraiguin ja bearrašiiguin.

Oahpuid áigge lean vuolgán mielde studeantapolitihkkii ja jagis 2017 ledjen Suoma ámmátallaskuvllastudeanttaid riikkasearvvis, SAMOKis, ságadoallin. Dán áigge barggan Suoma Logahatoahppiid Lihtus sosiálapolitihkalaš áššedovdin ja mu vástun lea váikkuhit láhkaásaheapmái mii guoská ee. nuoraid birgema, buresbirgejumi ja ovttaveardásašvuođa. Lean áirrasin Ohcejoga váldostivrras ja gielddaráđđehusas. Giđđat ledjen sosiálademokráhtaid evttohassan riikkabeaiválggain Lappi válgabires ja fidnejin 881 jiena.

Sápmelaš árvvut leat álo leamašan mu politihká vuođđun ja hálidan nannet min olbmuid jiena riikkadási mearrádusain. Dál lea áigi bidjat sámepolitihkkái eanet návccaid ja sávan beassat bargat iežan álbmoga buorrin čuovvovaš njeallje jagi.